Gërvalla voton nga Dusseldorfi: Votova për Kosovën që e duam më të fortë

14:51 | 8 Shkurt 2025
E.K

Ministrja e Punëve të Jashtme, Donika Gërvalla, ka bërë të ditur se ka votuar në Konsullatën e Kosovës në Dusseldorf, Gjermani, duke iu bashkuar kështu mijëra mërgimtarëve që kanë ushtruar të drejtën e votës në mbarë botën.

Përmes një postimi në Facebook, Gërvalla shprehu mbështetje për secilin mërgimtar, duke nënvizuar rëndësinë e kontributit të tyre për atdheun, pavarësisht largësisë.

“Votova për Kosovën që e mbani në shpirt, për Kosovën që e doni pa kushte, për Kosovën që e duam më të drejtë, më të fortë, më të denjë. Kjo votë është për ju. Për mallin që e keni bërë forcë, për fjalën shqip që nuk e latë të heshtë, për rrënjët që nuk i harruat kurrë. Kosova ju ka borxh shumë. E sot, unë dhashë votën time me bindjen se ky borxh duhet të njihet, të nderohet dhe të kthehet në vepra”, shkroi Gërvalla./Arbresh.info